Sah-Nit-Ni kimang

13^th September 2011:

Kumseh a Kuki Nammite in ana manjing bang in KSO Silchar tohgon na noi in Kuki Black Day (Sah-Nit-Ni) Shivalik Park, Meherpur (Silchar)  mun’ah nilhah 5:30pm-7:30pm in ana kimang in ahi.

Gl Thenkhogin Haokip (Secy Edn & Statistics KSO Silchar) in vaihomna anei in ahi. Sah-Nit-Ni kiman lo na ajeh le 1992-1995 kum sung’a Kuki nampi gentheinaho (Kho 350 val kihal lha, mi 950 val thi, mi 50000 val in-le-lou neilou sohdoh) hetjingna  ding in KSO Silchar Branch Vice-President Gl Paojatong Singson in mipi heng’a houlim na aneijin, mipi in one minute silence jong observe   akibol in ahi. Gl Paojatong in  “Sah-Nit-Ni Kiti hi Kuki Nampi thusim a suhmilthei lou thil khat ahitai. Hiche thilsoh hi ana umlou hileh Namsung’a aching-athem tua sang a itam diu , ikhantou be diu ahi. Hitia Namdang te khan set na hohi eiho in kipumkhat na a ineidiu ahi. Khangthah te kisemphat a Nampi ithah sem u angaitai” ti’n aseijin ahi.

KWS Choir in Pathen Vahchoi na la ngaitah jong ana sauvin ahi.  Speakers Dr Pauthang Haokip (Asst Professor, Assam University Silchar) le Pu L Singson a kon in mipi tilkhouna giltah tah ana kingai lha’n ahi.

Dr Pauthang Haokip ahin kisem Preliminary Draft simdohna ana neijin ahi. 1992-1995 thilsoh ho pohnatna thuphon jong ana neijin ahi. Nampi lhahsam na le khonung a pan lah ding dan thu ho jong hilna ananeijin ahi.

Pu L Singson in Psalms 80:7-8 simphong na aneitoh lhon in mipi tilkhouna le pohnat na thu ho ana phong in ahi. “ Isopi ana thi ho chu mona neilou ngen ahiuvin, Kuki ana hikhah jeh mai mai uva ahinkho ana cha’n u ahi”. Eimi te lhahsam na (politically, economically & socially) ho akon in mipi hilna le tilkhouna aneijin ahi. “Kiloikhomna ineihou hi kiboina le kidemna in ineiji bep uve. I dinmun u hi kingaito phat angai tan ahi, mi (jatdangho) kiloikhom bang in iki loikhom thei pouvin ahi. I lhahsam na hou hi koima dang in ei sem phat thei u ahitapoi, lengho jouse Leng le , pakai jouse Pakai, Doctor jouse Doctor, Chung Pathen bouvin i-Nampi uhi eisemphat peh thei u ahitai, Pathen song pum in, ama heng a taojing ute” ti’n ana sei jin ahi.

KSO Silchar President Gl Ngamkholen Haokip in ahung kikhom mipi hole Speakers teni chung’ah kipathu aphong in ahi. Ama’n asei be na a chun “ Sah-Nit-Ni kiti hi masanglaija pu-le-pa ten ana chepi u chondan khat ahi. Miham alom louva thina ato a ahileh, achungthu kisei chai tokah a chu Sah-Nit kiti ahi. 13^th September 1993 ni a Kuki Nammite mihem 108 Naga ho’n ana tha chu Kuki Nampi a ding’a nikhat a mithi tamni pen ahito lhon a Kuki Black Day kiti ahi. Nampi a ding a kikhelna khat ahithei na ding in Black Day hi mang ute. I-nam u Pathen sapset ichanlou nading uvin, Pathen he u hite” ti’n mipi hilchen na le temna  jong ana neijin ahi.

Mipi in Nampi a dingin taokom na ana kinei in ahi.

Taona thupi ho:

1.  Ana molliemsa ho insung mite lhamon nading
2. Nampi Pathen lungtoh hina ding
3. Nampi khankho ding
4. Namlam kai ho ding le adang dang

Mipi hung kikhom jat : 32